 walang singitan Bahagi na ng buhay natin ang pagpila. Halos hindi na natin mabilang ang mga pagkakataong iyon. Ito na marahil ang sunod sa ating pagtulog o pagkain na araw-araw nating ginagawa.
Flag Ceremony Lagi akong nasa harapan dahil “find your height” kasi. Araw-araw ding nilalagay ang kanang kamay sa dibdib at inaawit ang pambansang awit. May Panatang Makabayan pa iyon o school hymn na kabisang-kabisa mo na at dahil sa tagal nang ginagawa ay tamad ka na ring gawin ito. Comfort Room (CR) Nakaranas ako ng pila sa pag-ihi sa Grand Central at sa Robinson’s Manila. Takot talagang magkasakit sa bato. Ang mahirap minsan ay yung nadudumi ka na ay pipila ka pa. Halos nauutot ka na sa pagpigil. Dito sa Dubai ay madalang na madalang ang pila sa CR. Hindi ata mahilig magbawas ang mga tao dito. Amusement Park Mahaba ang pila sa bump car sa Star City tapos 3 minutes lang ay tapos na ang banggaan. Sa roller coaster or Space Shuttle sa Enchanted Kingdom ay konti lang kasi medyo takot ang iba sa mga extreme rides. Fast Food Sa Jollibee lagi ang mahabang pila lalo na kapag weekends. Dahil sa masarap ang spaghetti at jolly hotdog, titiisin talaga ang haba ng pila. Humahaba ang pila kapag ang isang customer ay hindi pa alam kung ano ang io-order at pinapapalitan pa ang nasabi nang order. Dito ay McDonald’s naman ang may pinakamaraming pagpila. Mabilis naman ang service kahit sa drive thru din ay fairly satisfied ka. Lotto Once or twice lang ako pumila dito dahil umabot na sa 100 million ang puede mong mapanalunan. SSS, NBI Clearance at Job Interview Pagtungtong sa kolehiyo ay na-enganyo akong mag-apply sa ilang mga part-time jobs. Dahil sa Jollibee at KFC ay naka-experience ako na pumila sa NBI Clearance at SSS. Ito rin iyong unang pagkakataon na pumila ako sa isang job interview dyan sa Pasig. POEA at DFA Sa pagkuha ng passport naman, dahil sa haba ng pila noon ay naglagay na sila ng mga silya dahil Maraming oras talaga ang bibilangin mo. Naalala kong nauubos ang mga baterya kong Eveready AA sa pakikinig ng The Doors at Beatles gamit ang walkman cassette player. Sa POEA ay isa pa ring mahaba ang pila, parang walang katapusan. Mabuti na lang at puede nang kumuha ng OEC dito sa abroad at hindi na pupunta pa sa POEA Ortigas. Airport Terminal Ang mahabang pila ay sa immigration at sa pag-check-in. Sama mo na rin yung pila kapag papasok at lalabas na ng eroplano. At yung pag-claim ng bagahe sa conveyor. Registrar Pagkuha ng permit, pag-apply sa Transcript of Records (TOR), diploma, graduation o simpleng tanong lang regarding sa status ng isang application. Medical Every year ay dapat na pumila ako sa pag-renew ng medical. Sanayan na lang din sa sitwasyon. Mahabang pila sa mga boys pero konting pila sa mga girls. LRT Sa lahat ng public transport sa Pilipinas, ang LRT ang pinakamarami kong napilahan. Monumento to Carriedo (PMI days), Monumento to Edsa (ROTC days), Monumento to Pedro Gil (PWU days). Buti na lang at nauso na rin yung mga stored value tickets. Naabutan ko pa yung tokens na mas mahal sa ibaba ng terminal at may kunwa'y free na candy. Mahaba kasi ang pila sa booth sa itaas kaya kung nagmamadali ka, grab mo na ang chance! Grocery Maliit pa lang ako ay kasama na lagi ng nanay dyan sa Ever Kalookan. Kapag natapos na sa pamimili, pipila sa counter ang trolley. Ngayon ay ganun pa rin, may trolley o wala, dapat pa ring pumila. Buti na lang at may designated lanes na (Less than 10 items). Death March, Death Penalty at Libing Very horrifying ang sitwasyon ng Death March. Pila na walang kasiguruhan. Pag-asa at kamatayan lang ang halos na pagpipilian. Ang pila sa Death Penalty ay medyo alam mo na kung kailan ka bibitayin. Ang hindi lang malalaman ay kung tatawag ang isang mataas na leader ng bansa para bigyan ka ng pass or pardon. Huh! Sa libing naman, 'pag mahaba ang pila, maraming kakilala o maraming usi. Pamaypay at panyo, purong itim at puting kasuotan ang masisilayan sa pila. Prusisyon, Sagala at Fiesta Parade Walang humpay na kandila at lusis. Mga float na makukulay at ang paghagis ng mga candy o kalendaryo. Nakapila habang umaandar. Parusa lang dahil traffic na naman. - - - Nagdudulot ng iba’t-ibang pakiramdam ang pagpila. Ito ay puedeng maramdaman bago pumila, habang nasa pila o pagkatapos pumila. Nariyan ang saya dahil makukuha at mabibili na ang kailangan o gusto sa buhay. Ito man ay tungkol sa pagkain, laruan, ticket, pera o isang resulta. Nariyan ang excitement dahil masisilayan na muli ang mga bagay o tao na nawalay nang matagal na panahon. Nariyan ang pangamba dahil maaaring malaman ang komplikasyon sa isang pag-aaral. Pag-aalala sa resulta na makakapagpabago ng mga nakasanayan na. Ang masilayan ang pagkukulang o pagbagsak sa isang ginawang effort sa pag-aaral o exam. Takot na mahuli at masita ang bawal na item sa bagahe ngunit kailangang maipuslit para sa kasiyahan ng iba. Ang paninibugho dahil ang resulta ng lab test ay mayroon nakitang tumor. Kailangan pumila para may malaman at may maramdaman. Kapag wala na ang pila, asahan na ang gulo at hindi pagkakaintindihan. Sa langit daw ay may pila. Karugtong lang ng pila dito sa lupa. © 2011 Lex Von Sumayo
0 Comments
|
